Motoriste wat vanaf Pretoria na Nelspruit reis, ry gedurig reguit aan in Malalane se rigting in plaas daarvan om links te hou na die stad. Dit is veral snags moeilik om tussen die twee roetes te onderskei. Donderdagaand omstreeks 18:30 het ‘n vragmotorbestuurder van Ni-Da ‘n U-draai op die kringpad gemaak nadat hy besef het hy is nie meer op pad Nelspruit toe nie. ‘n Taxi het in die agterste wa vasgejaag en die bestuurder is op slag dood. Geen remmerke was op die pad-oppervlak sigbaar nie.
Die vragmotorbestuurder het geskok op
die toneel vertel dat hy troeteldierkos in Nelspruit moes gaan aflaai. "Die pad het nie meer vir my bekend gelyk nie en ek het besef ek gaan Nelspruit misry. Ek het ‘n U-draai gemaak en gesien hoe die taxi op my afpyl. Ek het die bestuurder probeer waarsku, maar dit was te laat."
Die pad is aan beide kante toegemaak vir verkeer. Polisie- en verkeersbeamptes het die verkeer aan weerskante van die vragmotor herlei. Die polisie se forensiese eenheid het die toneel gefynkam vir leidrade en ‘n saak van strafbare manslag word ondersoek. Die oorledene se naam was teen druktyd nog nie bekend nie. Me. Anita Heyl, woordvoerder van Trans African Concessions (TRAC) aan wie die pad behoort, was nie vir kommentaar beskikbaar nie.